ՀՀ Աժ ֆինանսավարկային եւ բյուջետային ու ՀՀ ԱԺ տարածաշրջանային եւ եվրասիական ինտեգրման հարցերի մշտական հանձնաժողովների համատեղ նիստում Արկադի Խաչատրյանի եւ Միքայել Մելքումյանի նախագահությամբ նոյեմբերի 5-ին քննարկվել են «ՀՀ 2021թ. պետական բյուջեի մասին» ՀՀ օրենքով նախատեսված ԵԱՏՄ եւ տարածաշրջանի մյուս երկրների հետ կապերին առնչվող հարցեր:
ՀՀ արտաքին գործերի նախարարի տեղակալ Շավարշ Քոչարյանն անդրադարձ է կատարել Արցախի Հանրապետության դեմ ադրբեջանա-թուրքա-ահաբեկչական ագրեսիային եւ շեշտադրել, որ հիմնական խնդրի լուծումը ռազմադաշտում է, քանի որ յուրաքանչյուր երկիր ունի իր մնայուն արժեքներն ու դրանք վերաբերում են բոլորին: «Հույսը դնել, թե որեւէ երկիր կարող է կռվել քեզ համար՝ դա կործանարար է: Մենք պետք է լուծենք մեր հարցերը»,-ասել է փոխնախարարը:
Նրա հավաստմամբ՝ 2020թվականին շարունակվել եւ 2021-ին շարունակվելու են ԵԱՏՄ երկրների, ինչպես նաեւ Վրաստանի եւ Իրանի հետ աշխատանքները: Փոխնախարարն ընդգծել է, որ վերջին երկու պետությունների հետ մեր երկրի հարաբերությունները նահանջ չեն ապրել:
ՀՀ էկոնոմիկայի նախարար Տիգրան Խաչատրյանը շեշտադրել է, որ ԵԱՏՄ շրջանակներում իրականացվում են մասնագիտական աշխատանքներ: 2021թվականին կյանքի կկոչվի Սերբիայի հետ ազատ առեւտրի վերաբերյալ համաձայնագիրը, ինչն հայկական կողմի համար բարենպաստ պայմաններ կստեղծի այս երկրի տարածքում ապրանքների իրացման համար, որոնք մրցունակ են միջազգային շուկայում: 2021թվականին կշարունակվեն Սինգապուրի, ԻԻՀ-ի եւ Եգիպտոսի հետ ազատ առեւտրի պայմանագրերի կնքման հետ կապված աշխատանքները:
Բանախոսները նաեւ պատասխանել են պատգամավորների հարցերին:
